مثل العمي
كنت اتلمس واتحسس طريجي
خايف امشي واخطي خطوة
ما تلاقي ريلي مداس على الارض
خايف اطيح وما اقدر اقوم
من صغري تعودت
ما الاقي احد يشيلني ويسندني
ولقيتك
تمد ايدك وتسندني
تاخذ بايدي وتوجهني وتساعدني
لكن …
اهني المشكلة ….
ركز معاي شوية وحاول تفهمني ….
انت كنت تسحبني وتركض
وانا بالغصب كنت اسحب ريلي سحب واحاول اركض معاك
ما اقدر اجاريك
مثل الحمل الثقيل
هديت حيلك وكسرت ظهرك وانت تشيلني
انت تركض فيني جدام وانا اسحبك ورا
وفجاة …
لقيت نفسي بروحي
ما يمي احد ….
اصرخ انادي ….
ما اسمع حتى صدى صوتي ….
ظليت واقف مكاني ….
ما ادري شسوي وشلون اتصرف …..
محتار …. بين اخطي جدام … ولا ارجع ورا …
حتى احساسي بالاتجاهات ضاع ….
تعبت من الوقفة
قلت اقعد شوية ارتاح
اصفي ذهني واشوف شنو يصير بعدين
احدد مكاني واتجاهي
اخطط حركتي وتحركاتي ….
احس بالرعشة تسري بجسمي
ما ادري
رعشة برد ولا رعشة خوف
الخوف من المجهول
الخوف من التحدي
الخوف الفشل
وقفت مرة ثانية
خطوات مترددة ومتعثرة
احاول امشي
غشاوة بعيني … ضباب ، دخان ….. النظر مهزوز
احاول اركز واميز واتمعن بالنظر
معقولة ….. نظري صار ضعيف
ولا افكاري واوهامي المهزوزة اثرت على نظري
دقات القلب تتسارع
النفس متقطع
احس اني مختنق
غمضت عيوني
احاول اهدي نفسي
نفس عميق …. زفير طويل
كاني احاول اطرد كل مخاوفي معاه
نفس عميق …. انعش فيه افكاري ….. زفير
اطرد فيه نوبة القلق والخوف من صدري
بديت اهدى شوية … راحت نوبة القلق والخوف
صرت اقدر اتنفس بصورة طبيعية هادية
لكن لحظة …
انا شفيني معقد الامور ….
ليش ما اشوف اموري بطريقة ثانية
احيانا اصعب المعضلات اللي تواجهنا تكون حلولها بسيطة وسهلة وما تحتاج اي تعقيد او عبقرة حتى نحلها
بس احنا دايما مستعجلين على الحل
يبيلها شوية صبر و شوية هدوء