ْعـــــالــــم الـنــــوافـــــذ

Posted: February 7, 2015 in thoughts & ideas

المقدمة :

IMG_4962

عالم النـوافذ :

هي مجموعة خواطر وافكار واحلام
نمر بها في مراحل الحياة ، فحياتنا اشبه بالنوافذ والابواب
تنفتح وتنغلق اما بارادتنا او رغما عنا لسبب او لاخر
قد تتشابه او تختلف بيننا
بعض احلامنا تتحقق على ارض الواقع وان اختلفت بعض الشئ
وبعضها يظل مجرد حلم او كابوس او فكرة شغلتنا لبعض الوقت ان لم يكن الدهر كله

النافذة الاولى :

IMG_4444

ما ادري شفيني
النوم مجافيني
اتقلب بالفراش مو قادر انام
من عادتي احط دفتر وقلم يم راسي
اشخبط على اوراقه واشكي له همومي
الليلة حتى القلم معاندني
ما يخليني ابوح اللي بصدري
كانه والدفتر ملوا مني
احس بالاوراق تشتكي والقلم يبجي
كفاية نترجاك كفاية
ما فينا حيل نتحمل همومك والامك
حاول بدال الهموم تكتب عن احلامك
حاول ولو مرة تشوف حياتك من زاوية ثانية
حاول حتى لو تجذب على نفسك تلون حياتك
دمعة حايرة نزلت من عيني وحفرت خدي
نزلت وطبعت صورة على الاوراق
ملامحها ضايعة
شغلت بالي وانااركزو افكر واحاول اربطها بشي بحياتي
وفي كل مرة اشوف الصورة تتغيرة
قلبي ضرياته تتسارع
انفاسي تتقطع
احس بنفسي مختنق
تعوذت من ابليس ونطقت الشهادتين
حسيت النهاية خلاص قربت
توجهت للقبلة وانسدحت على فراشي
ولساني يستغفر ويدعي رب العرش يحسن خاتمتي
غمضت عيني وجهزت نفسي
فجاة
سمعت صوت او ظنيت اني اسمع صوت يناديني
فتحت عيني افتش عن صاحب الصوت
ما لقيت احد
رحت اتاكد من الباب مقفول وكان فعلا مقفول
رجعت لغرفة النوم
لقيتني بعدني بالفراش منسدح
تفاجات وخفت
ظليت اطالع واراقب نفسي
الظاهر هذا نوع من انواع انفصال الروح عن الجسد
او نوع من احلام اليقظة وعالم اللاوعي
حطيت ايدي على اصدري اتحسس دقات قلبي
ما حسيت باي شي
قعدت على طرف الفراش …
اطالع اروحي واتامل ملامحي
الدفتر بعده يمي على الفراش وبوسطه القلم
حسيت بقشعريرة تسري بجسمي ونا اطالع نفسي
ما ادري اذا انا نايم وهذا مجرد حلم
ولا انا ميت وروحي هايمة قبل ما تصعد
ضحكت … صرت مثل الافلام الهندية او مثل فلم الشبح ( Ghost )

النافذة الثانية :

IMG_4441

لحظة شوية لحظة
يمكن هذي فرصة
اشوف دنيتي وحياتي من منظور ثاني
يمكن انا الحين قاعد اعيش معجزة ربانية
عندي قرارات مصيرية لازم اتخذها
يمكن هذي فرصة اشوف تاثيرها على حياتي ومستقبلي
ولو انه ما ظل بالعمر كثر ما مضى على قولتهم
فجاة … لقيت نفسي في مكان ثاني .. مكان يمكن يكون غريب علي …
بس حسيت ان المكان مالوف …
الغريب اكثر ان قوة النظر عندي صارت حادة
صرت اشوف الاشياء اوضخ من قبل
جسمي يرجف … انفاسي تتسارع … بديت احس بالخوف اكثر
لا .. اكيد انا ميت الحين ..ولا اشلون انتقلت بسرعة لمكان ثاني بلمحة البصر
ونظري صار قوي واقوى من قبل ….
بعدين هذا المكان .. على بالي انه مكان غريب … طلع مو غريب .. لكن قوة النظر اليديدة خلتني اشوفه بطريقة غير عن قبل …
انا في حلم ولا علم .. ولا خلاص مت …
بس لحظة … اذا انا ميت … شلون احس بالصداع اللي حاس فيه الحين … واذا انا في حلم … شنو هالحلم الغريب .. ولا هذا اللي يقولون عنه كابوس…
هذي غرفتي القديمة … بيت ابوي القديم … هذي صورتي فوق المكتبة … التلفزيون … الاثاث …. بس في شي متغير … الغرفة مو نفس ترتيبها القديم …فيها اشياء وايد متغيرة ….
كان في شخص ثاني .. مستغل الغرفة …
اسمع اصوات تقرب من الغرفة … ما ادري شنو اسوي … وين اروح ….
فجاة .. الباب ينفتح .. يدخل واحد .. غريبة ما شافني …. لحظة .. هذا انا … يوم كنت اصغر من الحين …
شفيني قاعد اتحلطم وانا داش …. لابس بدلتي العسكرية .. اكيد توني راد من الدوام .. اشغل المكيفات
حر .. حر … داش فرن مو دار
ضحكت .. ما ادري على نفسي ولا على اللي قاعد يصير جدامي … اشوف نفسي وانا اتحلطم
يرن التليفون النقال .. الو .. انزين الحين ابدل هدومي وانزل ..
نزلت ورا نفسي … ههههه …. كانت اختي مالها خلق تصعد .. تناديني للغدا ….
السفرة مفروشة … الغدا جاهز …. هذا ابوي .. قعد ينطرني …
يبه .. صرخت .. ركضت وسبقت نفسي اللي تنزل … ابي احضنه …. لقيت نفسي سراب.. طيف وضيف عابر الزمان وراجع بالماضي … ما اقدر المسه … ولا حتى حس فيني …. ولا حتى حسيت فيه
وتذكرت … ابوي توفى من زمان … الظاهر انا الحين في عالم الأشباح والماضي
نزلت دمعة من عيني … وتاكدت اني احلم … لاني لو ميت .. … لو …
اه يبه اه …
قعدت قريب منهم .. يتغدون .. كالعادة .. ابوي يتحرش فيني .. وانا اتحرش فيه .. نسولف ونضحك ..

IMG_4443

النافذة الثالثة :

IMG_4959

عمري فوق الاربعين وليلحين
ليلحين يبه اشوف نفسي طفل ضايع
يبه من بعد عينك الدنيا ضاقت فيني
يبه وينك
يبه حلمت فيك الليلة ٍ
قلتلي زهب اغراضك باخذك معاي
يبه صحيت من نومي فرحان
افتح الكبت وجمع هدومي بجنطتي
ونطرتك عند الباب
تقول طفل ينطر ابوه يوديه المدرسة
يبه انتبهت لنفسي وتحدرت الدموع مثل النهر تحفر خدي
تذكرت انك فارقتنا من سنين
يبه وينك
ليلحين كل ما اشتقت لك حضنت صورتك وتذكرت صوتك
يبه دموعي عمت عيني والدنيا ضاقت فيني
يبه وينك
يبه متى تاخذني عندك

IMG_4958

النافذة الرابعة :

IMG_4894

وسط زحمة افكاري وشغلي وانشغالي
تذكرتني … !
وسالت نفسي ليش …؟؟
شلون نسيتني واهملتني …؟؟!!!
ضاع العمر خسارة ولا نفعت نفسي
اهملت نفسي وضيعتها بلا معنى وفايدة

IMG_4964

النافذة الخامسة :

كل واحد فينا في حياته تمر عليه احداث غريبة وعجيبة
يمكن تكون في ظاهرها مفيدة او مضرة
هذا يتوقف على نظرتنا لبعض الامور
بعضنا يكون تفكيره عميق ويحسبها بالمللي على تاثيرات الامور على البعيد ( نقول عنه معقد )
وبعضنا يصرف الامور حسب ما يعيشه كل يوم بيومه ( نسميه اهبل )
او هذا اللي بعضنا يفكر فيه ورايه الشخصي
بعضنا يحاول يحقق التوازن ما بين الامور
يحسب لكل شي حسابه وما يغفل تاثير الامور على المدى البعيد
تمتع بدنياك وعيشها مثل ماتبي
لكن
لاتنسى تبعات افعالك على المدى البعيد
كل شي معرض للتغيير وممكن بعض الامور اللي تكون في صالحك اليوم تكون ضدك باجر او العكس
او يمكن متوافقة

/2015/02/img_4960.jpg”>IMG_4960

في النهاية

مو لازم تفهم كل حاجهہ
ترى ﺎلنور ﺎلزايد يعميک.
وبعض الظلمة ممكن تريح العين ……

IMG_4961

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s